Voci antiche

di Vittorio Aprea

Me còcco e me sceto, sentenno ‘sti vvoce…

so’ vvoce luntane, so’ ‘e vvoce chiù doce…

Una, suttile e ténnera, me dice:-Figliu mio,

pienze a te stesso e lasciala chesta malinconia!-

Una, cchiù saggia e ferma. me dà cunziglie ‘e vita

a me c’a sissant’anne so’ mmiezo rimbambito…

E po’ ‘na voce flebile ‘e fràtemo carnale,

ca me ricorda ‘e vierze ‘e Persio, ‘e Giovenale,

ca recita a memoria Quasimodo e Montale.

e me fa’ capi’ ‘stu munno a quanto vale:

‘o sentimento, ‘a gioia, ‘na vena ‘e puisia

sempe te da’ sollievo pe’ chesta trista via…

E po’, ecco, ‘na voce chiù serena e squillante:

è chella ‘e n’atu frato ca pe’ me è stato tanto…

pe’ primmo se ne jette, pe’ primmo me lassaje

e chillu suono tiènnero io nun m’’o scordo maje!

E mmiez’a ‘stu cuncierto: nu coro ‘e tanti vvoce,

io sento pure chella ‘e n’atu frato doce,

ca spisso me cantava strufette e canzonette

e ca me déva sfizio cu’ cunte e barzellette.

Pur’isso se n’è ghiuto! S’è aunito a chistu coro!

Pure p’isso è scuccata l’ùrdema e triste ora!

Mò, mmiez’a ‘st’armunia soave ‘e voci e suone,

mò sento pure chella ca cchiù doce me sona:

‘na voce ca ripete:-Guàrdate ‘e ffiglie noste!-

muvènnome ‘int’a ll’uocchie ‘na làgrema annascosta

E po’ ne sente n’ata, chella d’’a sora mia,

ca cu’ nu tono roco accorda ‘a sinfunia:

Essa me dice ancora:-Bello! Tu si’ ‘o cchiù bello!-

( ‘sti parole erano n’eterno ritornello…)

Me còcco e me sceto, sentenno ‘sti vvoce,

so’ vvoce luntane, so’ ‘e vvoce chiù ddoce…

Me vòto po’ attuorno, me guardo ‘int’’o specchio…

…che pena me fa’ chistu povero viecchio!!!

                                                                                                          Vittorio Aprea

Lt, 11/02/2005