clic sul fiore per ascoltare la poesia recitata dall'Autore

Primmamatina

(a Rita) 

di Vittorio Aprea

Tu si’ ‘o principio ‘e ‘na rosa maggese…

E si’ ‘n’alba rusata e curtese…

Si’ nu suonno appena sunnato,

vasato

‘ndurato

da ‘e ragge ‘e nu sole malato,

ca spanne pe’ ll’aria suttile

n’addore umidiccio ‘e nuttata

gelata

passata

pe’ vicule, piazze, curtile…

ca m’asciutta ‘sta faccia lavata

da ‘e llagreme ‘e sanghe chiagnute

pe’ tte…

sulo pe’ tte…

E t’aggiu vista ancora dint’’o suonno!…

E t’aggiu stretta a mme, fata d’’e suonne!…

Te veco ancora cà, cu’ mme sdraiata

abbracciata

affannata

cu’ mme, ca ogne mumento te cunzumo

‘sta vocca rossa e chesti carne ‘e latte:

nu latte rosa, profumato e doce!

…E ‘a voce…

che voce!…

Tutto me resta ‘e te dint’’o cervello!!!

Me giro e affonno ‘e mmane ‘int’’e llenzòla

ca songhe ancora ‘nfose…d’’a nuttata,

ma scarfate,

gialliate

da ‘o sole ‘e ‘sta primmamatina!