Nnant ' 'o presebbio

di Vittorio Aprea

Guardo ‘o presebbio e veco l’espressione

d’’e pasture: Benino, Sarchiapone,

‘o monaco cercante, ‘a lavannara,

l’oste, Razzullo, ‘o ciaramellaro,

mentre dà ‘a voce a stesa ‘o mellunaro,

‘e Re Magge, ‘o scugnizzo, ‘o pecuraro,

e, ‘mmiez’a stu scenario, ‘a capannella:

Giesù Bambino cu’ ‘o vojo e ‘o ciucciariello!

Affianco a Isso ‘o Pate e ‘a Mamma stanno;

lloro ‘o vegliano e Isso sta fissanno

‘mmiez’a ll’immensità d’’o cielo scuro…

E chill’uocchie so’ luce ‘e amore puro!

Giesù, ma comme maje Tu si’ venuto

‘ncopp’a stu munno, ca manco te saluta?

Anze te fa’ truva’ vie ‘nzanguinate,

facce ‘e Caino, fammene traviate,

guaglione spierze, senza mamma e pate,

facce ‘e drugate cu’ ll’uocchie stralunate,

addò ca s’èssa sèntere p’’e vvie

campane a stesa e cante d’alleria…

Guardo ‘o presebbio e penzo a ‘sti brutture

ca ogge se fanno quase pe’ bravura,

e prego… prego a Tte, Bambino Santo,

Tu ca si’ ‘a pace e ‘ammore ‘e tutte quante,

Tu ca si’ Ddio ca dà giustizia e fede,

fa’ credere pure a chillo ca nun crede!

Facce turna’ pe’ sempre a ‘e tiempe belle

“quanno ‘o lupo pascèa cu’ ‘a pecurella”,

quanno s’assapurava’a puisia

d’e ccose ‘e niente e cu’ malincunia

pe’ ll’onne calme e chiare de lu mare

cantavano ‘e lluciane e ‘e marenare…

Ma mò guardo ‘e facce ‘e ‘sti pasture

e ‘e veco stralunate da ‘a paura…

‘O Bammeniello sulo è chiù sblennente:

Isso è turnato ancora pe’ ‘sta ggente!…