clic sul fiore per ascoltare la poesia recitata dall'Autore

Poesia

di Vittorio Aprea

Poesia…

‘na sola parola:

è una, una sola

ca porta ‘o prufumo

gentile e affatato

‘e cose luntane…

‘e cose passate

lassate

perdute

ca, comm’’int’’o suonno,

se fanno presente

e, ‘e vvide…’e ssiente,

turnate cu’ tte!

Poesia

vo’ dìcere po’ tanti ccose!

Ed Essa sultanto

sa  tègnere ‘e rosa

‘o nniro d’’o llutto

e, si si’ distrutto,

te fa risciata’

pe’ n’attimo ancora,

sulo pe’ nu mumento

te fa turna’ a campa’!

Poesia!

Sai che vo’ dìcere ‘sta parulella?

Vo’ dìcere ca ‘e scelle

‘e mise pure tu!

E, comm’a ‘na palomma,

vuole pe’ mare e monte

e chesta fantasia

te sbatte ‘a ccà e ‘a llà:

diventa ‘na malìa

ca te vo’ affattura’!

Poesia!

L’astrigne dint’’e mmane

e  tuorne piccerillo…

e, ‘mbraccia a Mamma toja,

te tuorne a ritruva’…

E siente chella voce

ca te cantava ‘a nonna

e, doce, doce, doce,

te siente ‘e cunnulia’…

Poesia,

unica ‘nnammurata

ca te cunzòla ognora:

Fèmmena prufumata,

‘ncipriata ,

‘ntulettata,

ca se dà tutta

e nun te cerca niente,

ma, preputentemente,

comm’a ‘na calamita,

s’attacca a te

e te rìala ‘a vita!

Poesia!

Nun sempe dà allerìa;

po’ ddà malincunia,

pecundria,

làgreme cucente,

pàlpete ardente,

e, mentre si’ distrutto

e staje quase a muri’,

mentre tu staje suffrenno,

te sceta dint’’e vvene

comm’a ‘na voglia ‘e bbene

e, lentamente,

comme si fosse niente,

‘o fféle se fa méle,

l’amaro se fa doce

e siente dint’’o core

comm’a ‘na voce:

‘na voce ca certo è chella ‘e Ddio!

Tu nun t’accuorge

E scrive… ‘na Poesia!!!