Palomme

di Vittorio Aprea

Ero guaglione e po’… all’intrasatto

me so’ truvato vecchio e ammucenuto…

‘A ggente mo’ me dice: - Ma ch’’e fatto?

Ire nu sole e mo’ te si’ alleccuto?!?

Ero nu sole, si’, e quanti scelle

‘e palomme leggiere e culurate

me giravano attuorno e cu’ ‘e reselle

me confessavano ch’erano ‘nnammurate…

Mo songo ‘ndifferente a tutte quante

Eppure palomme ne veco tante ‘e cchiù!

Ma ‘arraggia ca me piglia è ca so’ ttante

E so’ cchiù belle, so’ cchiù culurate,

svolazzano pe’ ll’aria, mmiez’’o bblù

ma… nun so’ cchiù palomme ‘nnammurate!…

Latina, 27.03.2002