Natale triste

di Vittorio Aprea

E’ venuto Natale! Che friddo se sente!…

Ah!…pe’ ll’aria: n’addore d’arance ‘e Surriento…

P’’e viche: ‘o profumo d’’a ‘nzogna squagliata…

Pe’ ‘copp’’e carrette: muntagne ‘e ‘nzalata!

‘Na folla ‘mpazzuta ‘e ggente che passa,

nu popolo ‘nfesta, ca ride e se spassa,

‘na stesa ‘e campane, ca parla a ‘stu core…

ca dice, tremmanno, mutive d’ammore.

Chist’anno Natale pe’ mme nun ce sta!

Pirciò: tira ‘nannze…va…vutta a passa’!

Nun ce sta chi me purtava p’’a mano:

se n’è partito…è ghiuto luntano!!!

Nun tengo cchiù chillu ténnero amico,

ca spisso cantava canzone antiche,

cantava e redeva: po’ me cuntava

‘e fatte d’’a guerra e…s’arrecriava…

Giesù, quanta vote saggiu ditto a me stesso:

-Senz’isso vicino comme facesse?-

mentr’isso cuntava ‘e fatte d’’a guerra

e io ‘o sentivo, assettato pe’ terra…

Monte Maggio, Codroipo, Bainsizza,

Piave, S.Michele, Castagnovizza…

Tutte nomme ca io saccio a memoria:

ll’aggiu ‘mparate ‘a chillu libro ‘e storia!

Sempe, a Natale, isso ‘nc’’e cuntava,

mentre tutto felice banchettava

cu’ ‘a famiglia aunita attorno attorno,

e santo overo era chillu juorno…

Chist’anno Natale pe’ mme nun ce sta!

Pirciò: tira ‘nnanze…va…vutta a passa’!

Papà se n’è ghiuto! Papà nun ce sta!

E…’e llacreme ‘e Mamma chi ‘e ppo’ cchiù asciutta’!!!

( poesia vincitrice al " II Premio Nazionale di Poesia"