A  mamma

di Vittorio Aprea

M’aggiu sunnato ‘na ‘nnammurata mia,

‘na ‘nnammurata vera, tutt’ammore…

Dint’a ll’uocchie teneva ‘a nustalgia

ed era pazza sulamente ‘e me.

Dint’’o suonno m’ha fatto nu surriso

e nu segno cu’ ‘a mano benedetta…

Pare ca m’invitava ‘nParaviso

pe’ sentirse vicino a me cchiù stretta.

Tant’ati fémmene io aggiu canusciuto,

ma comm’a Chella nisciuna aggiu ‘ncuntrata!

Nisciuna, mmiez’a ttante, m’ha saputo

tratta’ comm’a nu vero ‘nnammurato.

Teneva cinche figlie e ognuno ‘e lloro

Era pe’ Essa l’unico ‘nnammurato.

Sempe cu nu surriso spirciacore

Ce fissava cu’ ll’uocchie appassuliate…

E cu’ ‘o stesso surriso ‘sta nuttata

Essa è cumparza dint’’a casa mia.

Cu’ chella mano benedetta aizata

E cu’ nu sguardo chino ‘e nustalgia.

Comm’a quanno, d’’a copp’’o barcunciello

d’’o quarto piano, Essa me salutava,

mentr’io cu’ ‘o panino e cu’ ‘a cartella,

passanno dint’’o vico, m’’a guardavo…

Muta Essa steva… Po’ s’è avvicinata,

mentre a me me sbatteva forte ‘o core…

M’ha sussurrato:-‘O bbi’? Staje accatarrato!

Cuòprete buono, primma d’ascì, tesoro!-