Vurria

di Vittorio Aprea

Vurrìa turna’ all’epoca felice,

a quanno se credeva a ‘o Munaciello,

a quanno Maldacea e Pascariello

‘ncopp’e scene facevano sunna’.

Allora accuntentave a nu criaturo

accattànno semmente e franfellicche,

tanno ‘e perzone cchiù erano ricche

e cchiù cu’ niente se putea sciala’!

‘Na retenata ‘mmiezo Margellina,

birra  e taralle ‘nnant’a nu scialè…

‘na fèmmena strignuta ‘mbraccio a tte

e nu mutivo sott’’o cielo blù…

-Ma nun sempe erano rose e sciure,

pecchè ‘a miseria se magnava ‘a ggente!..-

-E pecchè, mò, cu ‘sti ddie ‘e fetiente,

ca se ‘ngrassano sulo cu’ ‘o parla’,

‘e può paraguna’ ‘a ggente ‘e primma?

Primma ce steva ‘o ricco sciampagnone

ca ‘e vvote se muveva a cumpassione

e dint’’o core teneva nubiltà…

Ogge tutti prumettono a ricchezza,

lavoro, dignità, pace e giustizia,

ma lloro s’arravogliano ‘int’’e vizie

e abusano d’ogne libertà!

Vurrìa turna’ all’epoca felice

a quanno era vivo Masaniello,

a quanno  pe’ viche e vicarielle

sentive ‘e cantà  Michelamma’…

O forse m’abbastasse nu mumento

‘e ‘ncuntra’ pe’ ‘na vota mmiez’’a via

chella faccela ‘e cera ‘e Mamma mia

ca bàlzamo e sullievo me po’ ddà!

E aspetto…aspetto ca Essa se presenta

e, leggia, me ’mmosta cu’ ‘a manella

‘a via p’arriva’ ‘ncopp’a ‘na stella

addò regna Giustizia e Libertà!

17/2/2004