Napule

di Vittorio Aprea

Cielo…

‘na pennellata ‘e blu ca tegne ll’aria…

‘na férza azzurra ‘ncopp’’o mare verde,

ca sbatte ‘nfaccia ‘e scoglie nirofummo

comm’a ‘na summa janca

ca fragne…

sbolle…

se perde…

Chisà pecché ‘sti cuntraste ‘e culure!

Dint’a chest’acqua se specchia

Napule bella mia

ca, rusata ‘e case,

azzurrata ‘e cielo,

smeraldo p’’o mare verde,

se stenne…

placida…

alléra…

felice…

‘ntulettata da ‘e sciure,

‘ncipriata ‘a ‘na nuvola,

‘mbriacata da ‘o sole!

E io miezo stupetiato…

stunato…

aspetto ‘a nuttata

pe’ m’astregnere a Essa…

pe’ me vasa’ ‘stu cielo avvellutato…

pe’ sperderme ‘int’’o verde

‘e ‘stu mare ‘ncantato!!!