DUMMENECA D' 'E PALME

(Vittorio Aprea, "Penziere mieje", Kimerik 2005)

:::::::::::::::::::::::
 

Dummeneca d' 'e Palme, core 'nfesta,

prufumo 'e rose...Pasca sta arrivanno!...

Si staje 'int' 'a casa, spalanca ‘na fenesta

e siente attuorno addore ca se spanna!

E’ comme s'arapesse nu sipario

'ncopp'a 'na scena ca ogn'anno se ripete!

Pare ca se rispira ogge n'at'aria,

e ogne anno nuje guardammo semp'areto….

Ce ricurdammo ca ce se 'ngignava

'o vestetiello nuovo pe’  'sta festa,

quanno, facenno sfoggio, se passava

pe' Ghiaia e pe' Tuleto tutte 'nfesta...

e se vedevano lucente e appriparate

'e pputeche addubbate 'e salumiere;

addore 'e primmavera p'ogne strata

se 'mmiscava a 'o prufumo d' 'e pastiere..

'O studente se deva appuntamento

cu' 'a stiratrice ca steva 'o puntone,

'o  "cocò" passiggiava alleramente

cu’  nu scemanfù da milordone!

Se passava ‘a matina. cu' ll'amiece,

ogne ttanto se sfutteva 'na guagliona....

Erano tiempe ca ognuno cchiù felice

pigliava 'a vita cu' poesia e passione!

E mò ce accuntentammo 'e j' ‘a Messa,

na passiata, 'na mangiata, 'na bevuta,

ma l'aria attuorno a nuje è sempe 'a stessa…

Nun ce penzammo cchiù a 'e tiempe perdute!!!

Voglio raccumanna  solo 'na cosa

a 'sta mugliera mia: "Mò comm'aiere,

'nzicme cu' 'o prufumo 'e chesti rrose,

famme sentì pure chillo d' 'a pastiera..."

"E chist'anno tu nc' 'j a mettere tre ccose,

tre cose ca me danno 'o Paraviso:

chesta pastiera adda essere zucosa...

'mpastata cu' ll'ammore, gioia e surrise!"

https://digilander.libero.it/apreavittorio/index.htm