'A nnammurata mia

di Vittorio Aprea

Io songo ‘nnammurato ‘e ‘na nennella,

‘na piccerella tutta rose e viole!

Me fa asci’ a ‘mpazzìa ‘sta criaturella,

ca pare ca nun dice ‘na parola…

Eppura parla!...Parla ‘sta guagliona!

E me dice certi ccose ‘nzuccarate

ca me fanno perdere ‘a ragiona:

me fanno compagnia ‘int’’e nuttate!

 Nun tene età… è sempe ‘na figliola!

    Dint’a ll’uocchie tene ‘a nostalgia,   

comm’’a teneva pure Mamma mia,

              e, ‘mponta ‘o musso, nu sorriso ‘e sole!        

                    Comme se chiama ‘sta ‘nnammurata mia?              

                     Zitto!...V’’o ddico! Se chiama: POESIA!